ئای کەی نیوس
محەمەد شیاع سودانی، سەرۆکی ئەنجومەنی وەزیرانی عێراق لەمیانی پێشوازیكرد لە فەرماندەی فەرماندەیی ناوەندی ئەمریکا سودانی جەختی لەسەر گرنگی ڕێزگرتن لە هەڵبژاردەی ئازادانەی گەلی سوریا کردەوە و ئامادەیی عێراقی دەربڕی بۆ یارمەتیدانی گەلی سوریا لەم دۆخ و قۆناغی گواستنەوەدا.
نوسینگەی ڕاگەیاندنی سەرۆکی ئەنجومەنی وەزیران، ئەمشەو لە راگەیەندراوێكدا بڵاویكردەوە، محەمەد شیاع سودانی سەرۆکی ئەنجومەنی وەزیران و فەرماندەی گشتی هێزە چەکدارەکان پێشوازی لە جەنەراڵ مایکل کۆرێلا فەرماندەی فەرماندەیی ناوەندی ئەمریکا و شاندەکەی یاوەری کرد.
تاوتوێی دوایین پێشهاتەکانی سوریا و کاردانەوە بەردەوامەکانی ناوچەکە کرا
ئاماژەی بەوەشكرد، لە دیدارەکەدا تاوتوێی هاوکاری و هەماهەنگی نێوان عێراق و هاوپەیمانی نێودەوڵەتی لە بەرەنگاربونەوەی تیرۆر و ڕوبەڕوبونەوەی توندڕەوی کرا، هەروەها تاوتوێی دوایین پێشهاتەکانی سوریا و کاردانەوە بەردەوامەکانی ناوچەکە کرا.
محەمەد شیاع سودانی لەمیانی كۆبونەوەكەدا جەختی لەوە کردەوە، “عێراق ئەندامێکی سەرەکی هاوپەیمانی نێودەوڵەتی دژی داعشە و پابەندە بە هاوکاری لەگەڵ هاوپەیمانیەتیەكە بۆ ڕوبەڕوبونەوە و بەدواداچون بەدوایی گروپە تیرۆریستییەکاندا، بەشێوەیەک کە ئاسایش و سەقامگیری ناوچەکە بپارێزێت”.
بەردەوام دەبین لە هاوکاریکردنی سورییەکان
ئاماژەی بەوەشكرد، “گرنگە ڕێز لە هەڵبژاردەی ئازادانەی گەلی سوریا بگرین و ئامادەین بۆ یارمەتیدانی گەلی سوریا لەم دۆخ و قۆناغی گواستنەوەدا، هەروەها بەردەوام دەبین لەگەڵ وڵاتانی عەرەبی و دراوسێدا بۆ هاوکاریکردنی سورییەکان و چەسپاندنی ئاسایش و سەقامگیری لە ناوچەکە”.
سودانی باسی لەوەشكرد، “پاراستنی ئاسایشی سوریا و یەکپارچەیی خاک و سەلامەتی گەلەکەی و ئەو فرەچەشنییە نەتەوەیی و ئایینی و کۆمەڵایەتییەی پێویستە، هەروەها دەبێت ڕێگری لە هێرشێك بۆ سەر هەر یەکێک لە پێکهاتەکانی گەلی سوریا یان پیرۆزییە ئایینییەکانیان بكرێت، عێراق بەدوای ڕەوتی ڕوداوەکان و کردارە متمانەپێکراوەکاندا دەڕوات نەک قسەکان”.
